စပါးအသင်းနည်းပြဖြစ်သူ မော်ရင်ဟိုက ဝုလ်ဖ်ဘာဂါအသင်းကို အနိုင်ရရှိခဲ့သည့်ပွဲတွင် အကောင်းဆုံးပုံစံပြသခဲ့သည့် ဒယ်လီအယ်လီအား ပုံမှန်နေရာအတွက် အာမခံချက်မပေးနိုင်သေးသော်လည်း လက်ရှိခြေစွမ်းအတွက် အလွန်ပျော်ရွှင်မိသည်ဟု ပြောကြားခဲ့သည်။
အယ်လီသည် စပါးအသင်းက (၄-၀) ဂိုးဖြင့် အနိုင်ရရှိခဲ့သည့် ယင်းပွဲတွင် အသင်းအတွက် ဦးဆောင်ဂိုးကို နောက်ပြန်ကန်ချက်မှတစ်ဆင့် သွင်းယူပေးခဲ့သလို၊ ဗင်နီစီယပ်စ်နှင့် ဂါရတ်ဘေးလ်တို့၏ သွင်းဂိုးများကိုလည်း ဖန်တီးပေးခဲ့သူဖြစ်သည်။
မော်ရင်ဟိုက “ကျွန်တော်တို့အတွက် အရမ်းခက်ခဲခဲ့ပါတယ်။ သူကလည်း ဒဏ်ရာပြဿနာတွေရှိခဲ့တယ်။ ပြီးတော့ အသင်းမှာဆက်နေမလား၊ ထွက်သွားမလားဆိုတဲ့ အကြောင်းတွေကိုလည်း တစ်ချိန်လုံးပြောနေခဲ့ကြတယ်။ အခုတော့ စျေးကွက်လည်း ပိတ်သွားပြီ။ သူလည်း ဒဏ်ရာ ကင်းစင်နေပြီ။ အလုပ်ကို ပျော်ပျော်ရွှင်ရွှင်နဲ့ စလုပ်နေပြီ။ သူ ကစားတာ အရမ်းကောင်းပါတယ်။ ဒီအချိန်မှာ သူ့ကို ပထမကစားသမားနေရာ ပြန်ထားတော့မယ်လို့ ကျွန်တော် မပြောသေးပါဘူး။ ဒါပေမဲ့ ရောက်လာမှာပါ။ သူ သွင်းယူခဲ့တဲ့ ဂိုးက အရမ်းလှပါတယ်။ ဒါပေမဲ့ ကျွန်တော့်အတွက်တော့ သူ့ရဲ့ဖန်တီးမှုတွေနဲ့ အလုပ်ကြိုးစားမှုက ပိုပြီးတန်ဖိုးရှိ ပါတယ်။ ဒီလိုပုံစံကောင်းကို ဆက်ထိန်းထားစေချင်ပြီး ဒီပွဲက ခြေစွမ်းကတော့ ကျွန်တော့်ကို အရမ်းပျော် ရွှင်စေပါတယ်”ဟု ဆိုခဲ့သည်။
အသင်းဖော် အဲရစ်ဒိုင်ယာကလည်း “အယ်လီအတွက် ကျွန်တော် အရမ်းဝမ်းသာပါတယ်။ သူ့ရဲ့အကောင်းဆုံးပုံစံကို တစ်ဆင့်ချင်းပြန်လာနေပါပြီ။ ဒီနေ့ပွဲက သူ အရင်တုန်းက အမြဲလုပ်ပြခဲ့တဲ့ စွမ်းဆောင်ရည်ပါပဲ”ဟု ဆိုခဲ့သည်။
