ယခုရက်သတ္တပတ်ကုန်တွင် ပြုလုပ်သည့် လူမှုမီဒီယာအသုံးမပြုရေး ကန့်ကွက်လှုပ်ရှားမှုတွင် ဥရောပဘောလုံးအဖွဲ့ချုပ်(UEFA)၊ နိုင်ငံတကာပရော်ဖက်ရှင်နယ်ဘောလုံးသမားများအဖွဲ့ချုပ်(FIFPro) နှင့် အီတလီဘောလုံးအဖွဲ့ချုပ်(FIGC) တို့လည်း ပူးပေါင်းပါဝင်ခဲ့ကြောင်း သိရသည်။
Facebook၊ Twitter၊ Instagram စသည့် လူမှုမီဒီယာအသုံးမပြုရေးလှုပ်ရှားမှုကို ဧပြီ (၃၀)ရက်မှ မေ (၃)ရက်အထိ ပြုလုပ်ရန် ပရီးမီးယားလိဂ်အပါအဝင် အင်္ဂလန်နိုင်ငံရှိကလပ်များက ဦးဆောင်ခဲ့ခြင်းဖြစ်ပြီး နောက်ပိုင်းတွင် UEFA နှင့် FIFPro စသည့် အဖွဲ့အစည်းများအပြင် အခြားအားကစားနည်းများမှလည်း ပူးပေါင်းပါဝင်ခဲ့ကြောင်း သိရသည်။
လူမှုမီဒီယာအသုံးမပြုရေး လှုပ်ရှားမှု ပြုလုပ်ရခြင်းမှာ အွန်လိုင်းမှတစ်ဆင့် စော်ကားပြောဆိုမှု၊ အကြမ်းဖက်ခြိမ်းခြောက်မှု၊ လူမျိုးရေးခွဲခြားမှု စသည့်လုပ်ရပ်များကို ဆန့်ကျင်ကန့်ကွက်ရန် ရည်ရွယ်ကြောင်း သိရသည်။
အဆိုပါလှုပ်ရှားမှုအစီအစဉ်တွင် ပရီးမီးယားလိဂ်၊ လိဂ်ချန်ပီယံရှစ်၊ League One၊ League Two ပြိုင်ပွဲများမှ ကလပ်အသင်း (၉၂) သင်း၊ အမျိုးသမီးစူပါလိဂ်ကလပ်အသင်းများ၊ စကော့တလန်လိဂ်မှ ကလပ်အသင်းများ၊ အင်္ဂလန်နှင့် စကော့တလန်ရှိ ရပ်ဘီကလပ် များ၊ ရပ်ဘီကစားသမားများအဖွဲ့ချုပ်၊ အင်္ဂလန်နှင့် ဝေးလ်စ် ခရစ်ကတ်အားကစားအဖွဲ့ချုပ်၊ အမျိုးသမီးခရစ်ကတ်အသင်းများ၊ ပရော်ဖက်ရှင်နယ်ခရစ်ကတ်ကစားသမားများအဖွဲ့ချုပ်၊ ဗြိတိန်စက်ဘီးအဖွဲ့ချုပ်၊ ပရီးမီးယားလိဂ်နှင့် အမျိုးသမီးစူပါလိဂ်ပြိုင်ပွဲ၏ စပွန်ဆာကုမ္ပဏီ Barclays၊ Sky Sports၊ BT Sport၊ Talksport စသည့် ရုပ်သံနှင့် ရေဒီယိုလုပ်ငန်းများ၊ လူမျိုးရေးခွဲခြားမှုတိုက်ဖျက် ရေးအဖွဲ့ဖြစ်သည့် Kick it Out၊ အင်္ဂလန်ရှိ ပရော်ဖက်ရှင်နယ်ဘောလုံးသမားများအဖွဲ့ချုပ်(PFA)၊ UEFA၊ FIFPro၊ FIGC စသည့် အဖွဲ့အစည်းပေါင်းများစွာက ပူးပေါင်းဆောင်ရွက်မည်ဖြစ်ကြောင်း သိရသည်။
လူမှုမီဒီယာအသုံးမပြုရေးလှုပ်ရှားမှုကို ဧပြီ (၃၀)ရက် ဗြိတိန်စံတော်ချိန် ညနေ (၃)နာရီမှစတင်၍ မေ (၃)ရက် ည (၁၁)နာရီ (၅၉) မိနစ်အထိ ပြုလုပ်သွားမည်ဖြစ်သည်။
အွန်လိုင်းတွင် လူမျိုးရေးခွဲခြားမှုများ၊ စော်ကားပြောဆိုမှုများကို အလွယ်တကူ ပြုလုပ်လျက်ရှိသောကြောင့် လူမှုမီဒီယာကုမ္ပဏီများအနေဖြင့် ၎င်းတို့၏ပလက်ဖောင်းများ တွင် ယခုကိစ္စကို ကိုင်တွယ်ဖြေရှင်းနိုင်ခြင်းမရှိပါက ပေါင်ဘီလီယံနှင့်ချီသည့် ကြီးလေး သည့်ဒဏ်ငွေချမှတ်ခံရနိုင်သည်ဟု ဗြိတိန်အစိုးရက သတိပေးထုတ်ပြန်ထားကြောင်း သိရသည်။
