Brexit ကာလအလွန် ပရီးမီးယားလိဂ်နည်းပြများအတွက် သတ်မှတ်ထားသည့် စည်းမျဉ်းသစ်အရ ဘီယဲလ်ဆာ၊ ဆိုးလ်ရှားတို့ကဲ့သို့ နည်းပြများအနေဖြင့် ဗြိတိန်တွင် အလုပ်လုပ်ခွင့်ရပ်ဆိုင်းခံရမည့် အခြေအနေနှင့် ရင်ဆိုင်နေရကြောင်း သိရှိရသည်။
ယင်းစည်းမျဉ်းသစ်သည် ပရီးမီးယားလိဂ်၏ မျက်နှာစာအပြောင်းအလဲတစ်ခုဖြစ်ပြီး ပြည်ပမှလာရောက် အလုပ်လုပ်ကိုင်မည့် နည်းပြများအနေဖြင့် အင်္ဂလန်ဘောလုံးအဖွဲ့ချုပ်(FA)၏ စည်းမျဉ်းစည်းကမ်းများနှင့် ကိုက်ညီမှု ရှိမှသာ အင်္ဂလိပ်ဘောလုံးလောကတွင် နည်းပြခွင့်ရရှိမည်ဖြစ်ကြောင်းလည်း သိရှိရသည်။
ယင်းစည်းမျဉ်းစည်းကမ်းများတွင် ပါဝင်နေသည့် သတ်မှတ်ချက်အချို့မှာ ထိပ်တန်းလိဂ်ပြိုင်ပွဲများတွင် အနိမ့်ဆုံး (၂)နှစ်ဆက်တိုက် နည်းပြရာထူးကို ဆောင်ရွက်ဖူးရမည်ဖြစ်ပြီး၊ ယင်းကဲ့သို့ မဟုတ်ပါကလည်း ထိပ်တန်းလိဂ်ပြိုင်ပွဲများတွင် နောက်ဆုံး (၅)နှစ်အတွင်း အနည်းဆုံး (၃)နှစ်ကြာ နည်းပြအဖြစ် ဆောင်ရွက်ထားရမည်ဖြစ်သည်။
FA နှင့် အင်္ဂလန် ပြည်ထဲရေးဝန်ကြီးဌာနတာဝန်ရှိသူများသည် ပြည်တွင်းအလုပ်လုပ်ကိုင်ခွင့်နှင့်ပတ်သက်သည့် စည်းမျဉ်းများကို ပြီးခဲ့သည့်လကတည်းက ဆွေးနွေးခဲ့ကြခြင်းဖြစ်ပြီး၊ ယခုအချိန်တွင် ဥပဒေမူကြမ်းအနေဖြင့် ထွက်ရှိလာခဲ့ခြင်းဖြစ်သည်။
Brexit အလွန်ကာလအတွက် ယင်းစည်းမျဉ်းများ အတည်ဖြစ်လာပါက လိဒ်စ်အသင်းနည်းပြ ဘီယဲလ်ဆာ၊ မန်ယူအသင်းနည်းပြ ဆိုးလ်ရှားတို့သည် အင်္ဂလန်မြေတွင် နည်းပြခွင့်အပိတ်ခံရမည့် အခြေအနေဖြစ်နေကြောင်း Daily Mail က ဖော်ပြခဲ့ခြင်းဖြစ်သည်။
မန်ယူအသင်းနည်းပြ ဆိုးလ်ရှားသည် မန်ယူအသင်းကို မကိုင်တွယ်မီက နော်ဝေကလပ် မိုလ်ဒီအသင်းကို ကိုင်တွယ်ခဲ့ခြင်းဖြစ်ရာ၊ ၎င်း နည်းပြခဲ့သည့် နော်ဝေလိဂ်အဆင့်အတန်းမှာ ထိပ်တန်းလိဂ်ပြိုင်ပွဲစာရင်းတွင် ပါဝင်ခြင်းမရှိချေ။
လိဒ်စ်အသင်းနည်းပြ ဘီယဲလ်ဆာမှာမူ လိဒ်စ်အသင်းကို မကိုင်တွယ်မီက မာဆေးလ်၊ လာဇီယို၊ လိုင်လီ စသည့်အသင်းများတွင် ကိုင်တွယ်ခဲ့သော်လည်း ကာလတိုအပိုင်းအခြားများသာဖြစ်သည့်အပြင် လိဒ်စ်အသင်းသို့မလာမီ နည်းပြလောကနှင့် (၁)နှစ်ကျော်ကြာဝေးကွာခဲ့သဖြင့် နောက်ဆုံး (၅)နှစ် အတွင်း (၃)နှစ်နည်းပြထားရမည့် စည်းမျဉ်းနှင့် မကိုက်ညီခြင်းဖြစ်ကြောင်း သိရှိရသည်။
ယခုစည်းမျဉ်းသစ်သည် ပြည်ပမှ လာရောက်မည့် နည်းပြများကိုသာ အဓိက တားမြစ်ထားခြင်းဖြစ်ရာ အာဆင်နယ်အသင်းနည်းပြ အာတီတာကဲ့သို့ မန်စီးတီးအသင်းလက်ထောက်နည်းပြ ရာထူးမှ အာဆင်နယ်အသင်း နည်းပြဖြစ်လာသည့်သူများအတွက်မူ တားမြစ်ချက်များအတွင်း အကျုံးမဝင်ဘဲ ဆက်လက်နည်းပြခွင့် ရရှိနေမည်ဖြစ်ကြောင်းလည်း သိရှိရသည်။
